Суусамыр айыл аймагында үй-бүлө көмөк каражаты кандайча чектеле тургандыгын айыл өкмөтүнүн социалдык жактан жетектөөчү адисинин милдетин аткаруучу  Жыргалбек Бекжанов айтып берди.  

Суусамыр айыл аймагы боюнча социалдык үй-бүлөлөрдүн саны канча?
— Суусамыр айыл аймагы боюнча социалдык үй-бүлөлөрдүн саны 109. Анын ичинен өтө жакыр үй-бүлөнүн саны 63, жалпы 338 адам катталган, 4,7% берет. Жакыр үй-бүлөлөрдүн саны 46, жалпы 119 адам, 3,5% берет. Жалпысынан соц паспорт 109 үй-бүлөгө ачылган, 457 адам 8,2%ды берет.

Жакыр үй-бүлөлөр кандай шартта аныкталат?
— Биздин айыл өкмөттө комиссия иш алып барат. Жергиликтүү кеңештин депутаттары жана айыл башчылар менен биргеликте иш алып барабыз. Атайын мамлекет тарабынан иштелип чыккан токтомдор бар. Ошонун негизинде аныкталат. Бул үй-бүлөлөрдүн кирешелери аныкталат. Алардын мал-мүлкү, жери, иштеген иши, жана дагы саап жаткан уйунун сүтү дагы эсептелет. Комиссия менен биргеликте жеринде текшерилип акт түзүлүп, биздин талапка жооп бере турган болсо гана жакыр үй-бүлө деп эсептелинет. Ошондон кийин гана үй-бүлө көмөк акча каражаты чектелет. Үй-бүлө көмөк 6 айдан 12 айга чейин чектелүүчү акча каражаты. Үй-бүлө көмөк төрөлгөндөн баштап 16 жашка чейинки балага гана чектелет. Суусамыр айылында бир балага 1215 сом, бизде бийик тоолуу аймактын пайызын кошкондо.

Ал эми кандай үй-бүлөлөр 6 айга чыгат?
— Бул жер үлүшүн албай калган жана эч жерде иштебеген үй-бүлөлөр. Ал эми жер үлүшү болсо 12 айга чейин чыгат. Биздин айыл өкмөттө көбүнчө үй-бүлө көмөк менен иш алып барабыз.

Жакыр үй-бүлөлөрдүн тизмеси жыл сайын жаңыртылып алмашып турабы?
— Ооба бизде үй-бүлө көмөк алты ай сайын каралып турат. Алыскы айылдарда айыл башчылардан билип турам. Үй-бүлө көмөк алган үй-бүлө башка жакка көчүп кеткен жокпу деп билип турабыз. Себеби үй-бүлө көмөк жашаган жеринде гана берилет. Башка жакка көчүп кете турган болсо бул каражат токтотулат. Ошон үчүн ай сайын текшерип карап турабыз. Ал эми соц паспорттогу үй-бүлөлөр жыл сайын каралат. Алардын кирешелери эсептелинип турат. Эгерде алардын кирешелери жогорулап көбөйө турган болсо анда соц паспорт жабылат.

Суусамыр айыл өкмөтү тарабынан жакыр үй-бүлөлөргө кандай жардамдар берилип турат?
— Айыл өкмөт тарабынан көптөгөн акчалай жардамдар берилип турат. Мисалы 3-декабрь майыптар күнүндө майыптарга жана ДЦП менен ооруган балдарга 1000 сомдон берилди. Андан тышкары азык-түлүк, көмүр дагы берилип турат.

Быйылкы жылы көмүргө канча каражат берилди?

-Быйыл көмүргө ар бир үй-бүлөгө 2000 сомдон акчалай жардам таратылды. Бизде Суусамырда көмүргө муктаж болгон аз камсыз үй-бүлөлөр көп. Анын баарына каражат жетпейт . Ошол себептен жылына кезек менен беребиз. Жылына бир эле үй-бүлө ала бербейт.

Социалдык жактан колдоого алган уюмдар дагы бар. Кандай уюмдар менен иш алып барасыздар?

-Бизге Кыргызстандагы “Кызыл Жарым Ай” коомунан жардамдар келет. Алардан азык-түлүк, кийим-кече, үй жылытуучу жабдыктар келди. Андан тышкары араб элинен жардамдар келет. Биз аны комиссия менен биргеликте карап тизме менен бөлүштүрүп беребиз. Араб элинен көбүнчө көмүр 10 каптан ар бир аз камсыз үй-бүлөгө берилди. Жалпысынан 30 тоннадай көмүр берилди.

Суусамыр айыл өкмөтү даталуу күндөргө карата кандай иш чараларды уюштурат?

— Карылар күнүндө Суусамыр айыл аймагы боюнча карыларды чакырып сый тамак уюштурдук. Андан тышкары 80 жаштан ашкан карыларыбызга 500 сомдон акчалай таратылып берилди. Майыптар күнүнө карата дагы мүмкүнчүлүгү чектелген 1 группадагы майыптарга жана кичинекей балдарга акчалай жардамдар берилди.

Жылдын башында айыл өкмөтүнүн бюджетинен акча каражаты бөлүнүп турабы?
— Ооба жылдын башында ар кандай иш чараларга, социалдык маселелерди чечүүгө карата акча каражаты каралат. Спортко дагы көңүл бөлүнүп акча каражаты берилип турат. Андан башка декабрь айында эле багуусунан ажыраган үй-бүлөлөргө, жалгыз бой энелерге жана аталарга 1500 сомдон акча каражатын тараттык. Жалгыз бой жашаган кары адамдарга да материалдык жактан жана дагы социалдык колдоо көрсөтүп келебиз.

Суусамыр элине кандай кайрылуу жасайт элеңиз?

— Суусамыр элине маалымат катары айта кетсем үй-бүлө көмөк албаган чыныгы жакыр үй-бүлөлөр болсо келип айыл өкмөтүнө кайрылсаныздар демекчимин. Анткени, кээ бир адамдарга маалымат жетишпей калышы мүмкүн. Ошол себептен келип кайрылсаңыздар жардам бергенге мүмкүнчүлүк болот эле.

Азиза Тамчиева